(ليتك معاي).......قصة مؤثرة جدا...

اللؤلؤة السوداء

سلاااااااام حياكم الله حبيت أنقل لكم قصة عجبتني واجد من إحدى المنتديات....
ماراح أطول عليكم ................





ليتـــــك معــــاي
مناية : احلف اني غالية عندك
سالم : كم مرة بقولج انج اغلى الناس عندي
مناية : انزين إلحين نحن من متى انعرف بعض جان تذكر ؟
سالم : أكيد اذكر . وحد ينسى أول يوم مع حبيبته الغالية
مناية : دام انك تذكر عيل اتعرف كم كملنا ويا بعض ؟
سالم : منايتي اشفيج اليوم قابضة اتحققين وياي .
مناية : لأن من متى وانت واعدني انك بتخطبني من ابوي وما اشوفك تحركت ... !
سالم : ياعمري ياقلبي اصبري علي اشوي
مناية : كل مرة اسمع منك هالرمسة
سالم : فديتج صدقيني اني رمست امي ووعدتني انها بترمس ابوي بالسالفة وبتقنعه .
مناية : ............
سالم : ألو .. ألو وين رحتي ؟
مناية : معاك
سالم : ليش سكتي عيل ؟
مناية : مادري .... أفكر
سالم : في شو اتفكرين ؟
مناية : في نهاية حبنا كيف بتكون .. تعتقد ان ابوك بيوافق انك تاخذني واتخلي بنت عمك ..
سالم : انتي لا اتحاتين الموضوع وان شاء الله تنحل الامور وانا بنت عمي ما ابغيها وما تكلمت عنها بالأساس
مناية : بس هي لك من يوم انتم اصغار
سالم : بلسانج قلتيها يوم كنا اصغار يعني انا ما بغيتها
مناية : اتعرف احيانا اقول كل الكلام اللي اتقوله ربيعتي عن الشباب صح
سالم : أي كلام ؟ مناية اشفيج
مناية : اتقول ان الشباب يعلقون الوحدة لين ما يشبعون منها وعقب يهدونها وياخذون البنت اللي تختارها لهم امهاتهم .
سالم : افاا منايتي إلحين انا اتشبهيني بهالنوعية من الشباب
مناية : شسوي والله انا احترت وخايفة انت ما تدريبي انا كيف حالتي النفسية صايرة .
سالم : صدقيني حاس فيج . ان شاء الله من باجر انا بنفسي بكلم ابوي
مناية : اعتبره وعد
سالم : وعد
مناية : ان شاء الله . المهم انا بسير ارقد وراي دوام .
سالم : ليش انتي بس وراج دوام ترا حالي من حالج
مناية : انزين ما قلنا شي . تصبح علي خير
سالم : بس
مناية : هيه بس يلا مع السلامة
سالم : وانتي من اهله . مع السلامة
" راح تعرف ان حبي مع مرور الوقت صايب
راح تعرف في النهاية ما حد يعوض مكاني
راح يكشف لك زمانك من هو اللي كان طايب
ومن هو اللي لجل خله عاند ظروف الزماني " جمعه بن نايم
عقب ما سكرت التلفون قعدت اتفكر في كلامه " ياربي شكله صادق وياي وبعدين نحن من سنتين انعرف بعض ما شفت منه إلا الخير عيل ليش فطيم اتقول انهم يلعبون على البنات "
اوهووو برقد ابرك لي من التفكير اللي ما وراه إلا عوار الراس .
وعلى الساعة 7 الصبح ..
مناية : أمي ...... أمي ...... أمااااااية
أم محمد : يالله بصباح خير انا اهني بالصالة اشفيج من صباح الله خير اتزاعقين ؟ الناس اتقول صباح الخير بالأول
مناية : صباح الخير امي وحبت راس امها
أم محمد : توا الناس صباح النور والسرور
مناية : شسوي امي كل من هاي اللي امدلعتنها اكثر عني
أم محمد : وابويه انا منو هاي بعد
مناية : منو غيرها يعني هاي الطمة حتى ما كوت لي الشيلة من البارحة عاطتنها اياها .. شغلها شغل اعناد وبس
أم محمد : اصبحنا واصبح الملك لله .. وحليلها من الصبح وهي بالمطبخ اتزهب لكم الريوق
مناية : امي انتي دومج جذي اتدافعين عنها
أم محمد : يعني إلحين بدل ما انتي قاعده تتحرطمين عالفاضي سيري واكوي شيلتج وإلحقي ع دوامج عن تتأخرين نفس دوم
مناية : انا ما اروم عليج الصراحة يا امي بسير بلبس شيلة ثانية عن اتأخر .
ركضت صوب غرفتها اتبدل الشيلة وجان اتشوف اخوها محمد ظاهر من غرفته وشعره اتقول متشوط .
مناية : بسم الله . هههههاااي حموووود شو هاااا
محمد : حمود في عينج اصغر عيالج انا
مناية : لا أكبرهم
ودخلت غرفتها قبل لا تيها كفخة من اخوها .. نزل محمد يتريق مع امه
محمد : صباح الخير يا اغلى ام بالدنيا
أم محمد : صباح النور هلا بولدي هلا بالغالي تعال فديتك اتريق وياي .
محمد : امي اشوفج ابروحج اليوم وين حبيب القلب عنج
أم محمد : توني اتفداك لا اتخلني افلعك بفنيان القهوة
محمد : لا لا امي دخيلج وراي مشوار ما فيني اتشوه من صباح الله خير
أم محمد : شو مشواره بعد
محمد : بمر على ربيعي يباني اوديه الجامعه يبي يسجل يكمل الكورس الياي
أم محمد : الله يوفقك ويوفقه
مناية : آآآمين
محمد : وانتي دوم رزة
مناية : مب رادة عليك .. يلا امي فمان الله
أم محمد : فمان الكريم ديري بالج على عمرج
مناية : ان شاء الله .
ظهرت وركبت سيارتها وعلى طول اتصلت بسالم : صباح الخير يا اغلى حب .
سالم : صباح النور والورد يالغالية . اشحالج ؟
مناية : ابخير دامك ابخير
سالم : تسلمين حبيبتي .. ليكون اترمسيني بدون سماعة
مناية : أووه نسيت آخذها ما عليه حبيبي شو تتحسبني ماعرف اسوق وانا ارمسك بالتلفون سالم : أخاف عليج انتبهي للدرب
مناية : اتخاف علي !
سالم : اكيد اذا ما اخاف عليج اخاف على منو عيل ..
مناية : امممم اوكيه انا قريبة من الدوام اخليك إلحين
سالم : يلا عيل تحملي على عمرج
مناية : اوكيه بحفظ الله
سالم : يحفظج الرحمن .
أول ما سكر عن مناية سار عند امه : امايه فديتج
أم سالم : هالتفدي وراه شي
سالم : امايه تراني بعدني مانسيت السالفة
عقدت أم سالم حيّاتها: أي سالفة ؟؟
سالم : امايه ما قلتلج اني ابي اتزوج
أم سالم : شوف يا سالم ابوك ما بيرضى بغير بنت عمك
سالم : وانا بنت عمي ما ابغيها
أم سالم : وليش ما تبغيها .. البنت يعيبها شي
سالم : البنت ما فيها شي بس انا مالي خاطر فيها .. انا ابغي آخذ اللي في بالي .
أم سالم : ابوك مب راضي
سالم : امي انا البنت احبها وباخذها ولا ابغي غيرها ..

وطلع من البيت وهو متضايج وشايل هموم الدنيا يبي حبه مناية ويبي رضا امه وابوه .. وتم يدور بهالشوارع ونسى شي اسمه دوام ومر الوقت وهو بالسيارة ووقف عند البحر وقعد عالشاطي ابروحه وتم سرحاان ويفكر .
ومن ظهرت من الدوام وهي تتصل فيه لين ما وصلت البيت ..
مناية : ياربي هذا ليش ما يرد علي من متى وانا ادق عليه . بقوم ايلس بالصالة احسن لي وعقب برد بتصل فيه . ولا اذا قعدت بالغرفة بتخبل من كثر المحاتاه .
نزلت وقعدت مع امهاا وابوها وبالها منشغل في سالم .
أم محمد : منااااية
بو محمد : خليها إلحين شو تبين فيها
أم محمد : خلني ابي ارمسها
مناية : خير امي شو السالفة
أم محمد : مناية فديتج .... ويقاطعها بو محمد : لا تشغلين بال البنت من إلحين وبعده ما صار شي .
أم محمد : وكيف ما استوا شي ونحن راضين ..
ومن جهة ثانية مناية قاعدة تطالعهم ومب فاهمة شو السالفة افكارها تشتتت بين امها وابوها وسالم : خير ابويه شو صاير ؟؟!!
بو محمد : ماشي فديتج قومي نتغدى الساعة قريب الثلاث ونحن بعدنا ما تغدينا .
وفي زاويه ثانية سالم قاعد يفكر باللي بيسويه ومر الوقت وهو ما يدري ومب حاس باللي حواليه . وفجأة صحى من غفلته وكان الوقت قريب المغرب .. قام ومشى صوب سيارته ولقى مكالمات ومسجات من منايته وأمه . طنش التلفون وتحرك من مكانه .
قاعدة اتابع التلفزيون وسرحانه شافها اخوها محمد : ها الدبة شو اتابعين ؟
بس ما حصل رد شاف مجرد عيون متحجرة على التلفزيون ويلس عدالها وجان يدزها من جتفها وبغت اتطيح من الغنفة ... وضحك عليها وعلى شكلها .
مناية : بسم الله من وين طلعت انت ؟!
محمد : من المصباح السحري
مناية : سخيييييييف
محمد : مثلج
مناية : عن السخافة بخبر عليك امي
محمد : خبريها شو بتسوي يعني اصلا امي اتحبني انا اكثر منج
نشت من مكانها امعصبة ودخلت غرفتها عقب ما رضخت بالباب ....
طلعت أم محمد من المطبخ: بسم الله شو هااا
محمد : ماشي بس بنتج قاعدة تتمرن
أم محمد : تتمرن !! وبعدين انت من متى اهني
محمد : قبل اشوي داش البيت
أم محمد : عيل وينها مناية توها اتابع التلفزيون
محمد : بنتج محد يقدر يكلمها صايرة جبريت
أم محمد : أكيد انت لعوزتها
محمد : ما لعوزتها ولا شي بس هي ما تتحمل اتعصب على أي شي لو انه ما يسوى .

دخل سالم البيت وويهه مخطوف .. ومشى بخطوات ثقيلة لين ما وصل لباب غرفته وشافته أمه ..
أم سالم : سالم وينك من الصبح ادق عليك ما اترد ..
طالعها بنظرة وهو مب مستوعب اللي تقوله أمه : أمي تعباااااان
أم سالم : بسم الله عليك يا وليدي شو فيك ؟
سالم : خلوني ابروحي
ودخل غرفته وقفل على عمره الباب
استغربت أم سالم من ردة فعل ولدها تمت تطالع باب غرفته ونزلت عينها وراحت تيلس بالصالة تتريا بو سالم ..

اللؤلؤة السوداء

مناية : خايفة عليه فطيم ما يرد علي من صكرت عنه الصبح
فطيم : اتحصلينه لاهي عنج
مناية : إلحين انا اكلمج مب عشان اتغثيني بتعليقاتج
فطيم : مادري شو عايبنج فيه
مناية : فطيم انتي ما اتعرفينه
فطيم : شو ما اعرفه ترا الشباب كلهم نفس الطينة يسمعونج كلمتين حلوين وكله جذب والبنت وحليلها اتصدق كل شي
مناية : بس سالم مب من هالشباب اللي ترمسين عنهم
فطيم : مادري شو امسوي فيج شكله غاسل مخج عدل
مناية : اوووف وبعدين وياااج
فطيم : خلاص اعصابج ما يسوى علي
مناية : اتعرفين وعدني اليوم الصبح انه يكلم ابوه عنا
فطيم : وعدج الصبح وشرد .. إلحين ما يرد عليج شكله هوّن
مناية : أقولج جلبي ويهج مادري ليش اخبرج عن كل شي
فطيم : أفااا إلحين تبيني اجلب ويهي
مناية : والله انتي اللي تبينه حق عمرج من كلامج اللي يغث
فطيم : الله يسامحج
مناية: ويسامح الجميع . اقولج بخليج إلحين بتصل فيه بشوفه .
فطيم : اوكيه يا جولييت
مناية : باااايخة لانج ما اتعرفين الحب
فطيم : ولا ابي اعرفه
مناية : اصلا الحب ما يبي يعرفج
فطيم : احسن
مناية : يلا بسج رمسة .. مع السلامة
فطيم : مع السخلني ادق عليه ولهت عليه وعلى صوته فديته
سالم : أ.. ألوو
مناية : ساااالم اشفيك
سالم : مناية
مناية : حبيبي اشفيك بلاه صوتك
سالم : تعباان اشوي
مناية : ما اتشوف شر حياتي يعله فيني ولا فيك
سالم : بسم الله عليج لا اتقولين جذيه
مناية : ولهت عليك وينك من الصبح
سالم : تعبت اشوي وما قدرت ارد على التلفون
مناية : خلاص عيل دام اني تطمنت عليك اخليك ترتاح
سالم : ان شاء الله وانتي بعد ديري بالج على عمرج تراج غالية عندي
مناية : حبيبي انت
سالم : يلا الغالية تصبحين على خير
مناية : بترقد من إلحين
سالم : هيه لاني تعبان وااااايد
مناية : سالم
سالم : عيون سالم
مناية : اشفيك ؟؟
سالم : ما فيني شي بس ابي ارقد
مناية : خلاص عيل تلحف عدل
سالم : ان شاء الله
مناية : مع السلامة
سالم : في وداعة الرحمن ..
" مادري شو اقولج مناية .. مب عارف كيف اتصرف .. انا وعدتج وبكون عند وعدي بس يبالي وقت " ورقد من كثر ما يفكر كيف يتصرف مع ابوه ..
مناية : أمي ... أمي .... بسم الله انت بعدك اهني
محمد : لا هناك
مناية : اتصدق
محمد : لا
مناية : محمد وبعدين يعني
محمد : قولي شو اللي اصدق
مناية : انت مثل اربيعتي
محمد : يا ويل حالي منو اربيعتج
مناية : عاد من زينكم انتم الثنين نفس الطبع فيكم
محمد : احم احم
مناية : لا تنفش ريشك تراكم ملاقيف نفس بعض هههههههااااااااي
محمد : اتصدقين
مناية : لا
محمد : أول مرة اعرف انج سخيفة
مناية : شسوي عاديتني
محمد : ما اتضحكين انزين
مناية : ويه نسييييييت
محمد : حمدلله والشكر
مناية : أمي .. أمي
ودخلت المطبخ على امها وشافتها اتزهب العشا وجان تحضنها واتبوسها على راسها : أمي خلي عنج أنا بكمل
أم محمد : فديتج خلصت أنا بس باقيلي اسوي العصير
مناية : خلاص احلى عصير بسويه لكم
أم محمد : عساج دوم مستانسة يا بنتي
مناية : أمي انا اليوم فرحانة وااااايد وااااايد
أم محمد : الله يبلغني فيج عروس قولي آمين
احمرت خدودها من كلام أمها وقعدت اتسوي العصير وفجأة طاح الكاس عن ايدها وانكسر ..

أم محمد : طار الشر .. مناية اشفيج شو ياج
مناية : هاا لا ماشي إلحين بشله .. ويلست اتشل الزجاج المتناثر وحست بشي غريب ....
أم محمد : خليه عنج بتشله سوناتي ..... سوناتي .. سوناتي تعالي شلي هالكاس المكسور
سوناتي : زين مدام
أم سالم : بو سالم ترا الولد بعده مصر
بو سالم : خليه بتفاهم وياه بعدين .. وبنت عمه شو ذنبها
أم سالم : ايه بس
بو سالم : لا بس ولا شي كم يوها من الخطاطيب وانا اردهم عسب ولدي ياخذها ..
أم سالم : بس سالم ما قال لنا انه يباها
بو سالم : قال ولا ما قال عنود بنت عمه وهو اولى بها
أم سالم : ولدك وانت تفاهم وياه وعسى الله يهديه ..
ياربي شو مستوي حاسة ان في شي صاير ... كنت مستانسة وفجأة حسيت بنغزة .. الله يستر ... صوته ما كان طبيعي اليوم .. حتى ما اقدر اتصل فيه وحليله قال بيرقد تعبان .. خلاص بتصل فيه اول الصبح .
فتح عيونه بثقل حس بألم وخمول ما قدر يقوم من فراشه .. مد ايده وشل تلفونه وشاف الساعة 8 ونص الصبح ولقى مكالمتين من حبيبته " غريبة كيف ما سمعت التلفون .. أااخ راسي شكلي محموم مب قادر انش وحاس ابرودة " رد تلحف وغمض عيونه وفجأة سمع حد يدق الباب ....
أم سالم : سالم ... سااااالم ... ساااااااالم يما اشفيك ما اترد علي ولا بعد قافل الباب .
أوووه نسيت الباب مقفول .. بقوم افتحه عن تحتشر علي امي ابروحهااا اتحاتيني ..
نش بصعوبة وسار صوب الباب وفتحه ..
أم سالم : سالم فديتك اشفيك من متى وانا ادق الباب اواعيك حق الدوام وانت ما اترد علي سالم : أمي حاس بتعب اشوي
أم سالم : بسم الله عليك اشفيك عيونك صايرة حمر .. "وحطت ايدها على خده وشافته امسخن " ويه سالم قوم بنوديك الطبيب
سالم : لا أمي ابي ارقد اشوي تعبان مب قادر اتحرك
أم سالم : انت محموم ولازم انوديك للطبيب بيعطيك الدوا وبتطيب
سالم : بعدين امي ... " ولف عن امه وسار صوب افراشه وحط راسه وغمض "
فطيم : اتصدقين خالد شكله معجب فيج
مناية : أي خالد انتي بعد
فطيم : خالد الموظف إللي بالقسم الثاني
مناية : صدق انج متفيجة وشو إللي خلاج اتقولين انه معجب
فطيم : مادري من اسلوبه معاج
مناية : لا الغالية لو 100 واحد معجب فيني غير سالم ما اشوف
فطيم : ما عندج سالفة
مناية : ليش عاد ؟؟
فطيم : لأن خالد شكله راهي وبيعيشج في جنة لو سويتيله سالفة وما تدرين يمكن ياخذج في يوم من الأيام .
مناية : خليه حقج . وبعدين راهي ولا امنتف انا اشلي فيه والجنة إللي ترمسين عنها مب بالفلوس انعيشهاا
فطيم : كلام فقارى
مناية : الكلام معاج ما منه فايوفي مكان ثاني من هالعالم كله عنود تبني احلامها مع ولد عمها سالم وعايشة بأحلامها الوردية ..
سلمى : عنود وبعدين وياج
عنود : خليني اعيش في احلامي الوردية
سلمى : يا خوفي عليج من هالأحلام
عنود : ليش انتي جذيه اتحبطين من معنوياتي
سلمى : انا اقول لو تنتبهين لدراستج احسن من رسم هالقلوب
عنود : فديت هالقلوب ..
سلمى : الله يعينج
عنود : آآه يا سلمى لو تدرين كل ما انزورهم واصادفه جدامي احس برجفة واحس ان اللي حوالي بيسمعون دقات قلبي من قوتهااا
سلمى : عادت حليمة لعادتها القديمة
عنود : بس تعتقدين انه يحبني مثل ما انا احبه
سلمى : اسأليه
عنود : ايه شو أسأله ؟ استحي
سلمى : انزين افرضي انه ما يحبج
عنود : حرام عليج لا اتقولين جذيه .. فال الله ولا فالج
سلمى : بسم الله كليتيني بقشوري
عنود : عيل هاي رمسة اتقولينها
سلمى : تعالي بخبرج انتي مب اتقولين انج امحيرينج حق ولد عمج
عنود : ها إللي سمعتهسلمى : بس خلاص دام ها إللي سمعتيه مب مهم يحبج ولا لأ تراه جذيه ولا جذيه بياخذج
عنود : شو مب مهم .. غير يوم كل واحد يحب الثاني
سلمى : عيل اشرايج اتقولين له انج اتحبينه
عنود : تبين امي تقصبني
سلمى : عيل جب ويلا جابلي دروسج ...
فطيم : ما بغينا انخلص
مناية : اذا انتي كارهة الدوام لهالدرجة قدمي استقالتج
فطيم : لا ما بقدمها إلا يوم بييني ذاك الراهي
مناية : انطر يا حمار .. إلين
فطيم : نعم نعم نعم
مناية : ماشي يلا انروح يوعانه بسير اتغدى
فطيم : يلا مع السلامة
مناية : مع السلامة
ركبت سيارتها واتصلت بسالم " هذا بيجتلني من المحاتاة من متى وانا اتصل ولا يرد "
مناية : يا ربي شو هالحالة ..
سالم : اممم ألووو
مناية : سالم وينك من الصبح أدق عليك ليش ما اترد
سالم : فديتج تعبان وزين واعيتيني إلحين ..
مناية : تعبااااان .. !! شو فيك
سالم : حاس ابعمري محموم اشوي
مناية : ما يخصني اشوي ولا وايد اتروح العيادة يعني اتروح
سالم : ان شاء الله بروح العصر
مناية : أكيد
سالم : أكيد
مناية : طمني عليك عقب
سالم : اوكي يلا خليني إلحين بقوم بتغسل وبتغدى
مناية : بالعافية
سالم : على قلبج حبيبتي
مناية : تسلم يالغالي يلا أنا بعد وصلت البيت
سالم : ديري بالج على عمرج مع السلامة
مناية : مع السلامة
دخلت البيت ركض قبل لا يشوفونها اخوانها وبدون ما اتشوف جدامها دعمت امها .. وطاحت شنطتها
أم ناصر : حسيبج الله عنبو مب ابنية اشفيج تركضين
عنود : هااا لا ماشي ماشي
أم ناصر : عنودو اشفيج شو امسوية
عنود : مب امسوية شي انا بسير غرفتي
ركضت صوب غرفتها ونست شنطتهااا
أم ناصر : تعالي شلي شنطتج
ناصر : وينها .. وينها مسودة الويه
أم ناصر : بسم الله على بنتي شو امسوية
سار صوب غرفتها ولقى الباب مقفول : أقولج فجي الباب
بس ما حصل رد ....
ناصر : بتفجين الباب ولا اكسره
أم ناصر : ناصر اشفيك على اختك شو امسوية
ناصر : ماعليه دواج بعدين خليني اشوفج ..
تمت تطالعه أمه ومب فاهمة شو إللي مستوي : ناصر شو السالفة فهمني
ناصر : حضرة جنابها تتحسب عمرها الأميرة ديانا عاقة شيلتها وواقفة في الباص .
أم ناصر : ناصر يا ولدي بعدها ياهل
ناصر : يااااهل ! اوكي انا بخليها هالمرة عشانج بس
قعدت تسمع من ورا الباب الكلام اللي يدور بين امها واخوها ناصر ودموعها حارقة خدهااا : مب حالة هذي كل مرة ينازعوني ويتحكمون فيني وكل شي ممنوع ياربي متى افتك من هالهم والسجن .. متى بعيش مثل باقي البنات ..
عقب ما رد من العيادة قعد بالصالة يتريا ابوه عشان يكلمه بالسالفة ..
أم سالم : ما اتشوف شر يا سالم
سالم : الشر ما اييج امي ... امي وين ابويه ؟؟
أم سالم : سار السوق وبيرجع الحين ... ليش ؟
سالم : أباه في سالفة
دخل بو سالم وفي ايده أجياس الخضرة وشاف أم سالم وناولها الأجياس
أم سالم : عنك بو سالم .... وخذت الأجياس ومشت صوب المطبخ بتغسل الخضرة وبترتبهن في الثلاجة .
بو سالم : ها سالم شو صحتك إلحين ؟
سالم : الحمدلله ابوي ابخير ... ابويه انا ما جد طلبت منك شي ولي طلبة وحده بهالدنيا وما أبيك اتردني .
بو سالم : خير ان شاء الله
سالم : ابوي انت تدريبي انا مابي بنت عمي ولا قلت اني ابيها وفي بالي وحده وودي اخذهاا ..
عصب بو سالم وتم يطالع ولده بنظرات : سالم انا كم رديت من الخطاطيب عن بنت عمك عسب تاخذها وما يصير الحين انت تاخذ غيرها .
سالم : ابويه هذي حياتي اللي بعيشها ليش اتقررون من كيفكم .. هاي حياتي افهموني ..... حرام عليكم اللي اتسوونه فيني حراااام
بو سالم : حرمت عليك عيشتك واللي في بالك شيلهاا فااااهم

نش سالم من عند ابوه وظهر وركب سيارته ... وكانت الساعة 8 بالليل ..

أم محمد : مناية حبيبتي بغيت اقولج ترى البارحة خطبوج ..
قاطعتها مناية : شووو

اللؤلؤة السوداء

أم محمد : بسم الله اشفيج خليني اكمل كلامي .. سمعي يابنتي انتي الحين مب صغيرة وياما ردينا عنج الخطاطيب ولكن هالمرة الريال ما فيه عيب كامل والكمال لله ... ونحن نبالج الستر وانا الحين اقولج هالرمسة لأن ابوج واخوج موافقين وانا بعد راضية .. وانتي عليج اتصلين الاستخارة وإللي فيه الخير الله بيجدمه .. شو قلتي
ساكتة ودموعها متحجرة بعيونها واتفكر بسالم " سالم وينك ليش تأخرت عني .. ليش "
أم محمد : مناية الغالية مابي ردج إلحين . وابيج اتحطين في بالج دام ان كلنا راضين الله بيوفقج في حياتج ونحن مانبي لج إلا كل خير .
" آآه ياقلبي .. سالم وينك عني وينك " وقعدت اتصيح في غرفتهاا واتصلت في ربيعتها فطيم مناية : شو زين اقولج في واحد ياي يخطبني
فطيم : شو فيها اخرتها تراج بتعرسين
مناية : انتي تستهبلين علي ولا شو وسالم
فطيم : مناية حبيبتي كم مرة بقولج ان الشباب اذا رمسوا ويا وحده مب معناته انهم بيرتبطون بها وبعدين انتي ياج نصيبج لا تردينه .
مناية : بس سالم غير الناس كلهم يحبني موت وقال انه كلم امه بموضوعنا .
فطيم : وانتي صدقتيه ..!!
مناية : وكيف ما اصدقه وانا احبه وهو ...
فطيم : بس بس صدق انج هبله إلحين ياينج نصيبج لين عند الباب وتبين اتردينه علشان واحد وعدج وما نفذ وعده لج .
مناية : انا الغلطانة إللي اخبرج بكل شئ وبعدين لا تغلطين على سالم .
فطيم : مناية ما غلطت على حد بس هذا الواقع صدقيني
مناية : .................. ودموعها تشق خدهاااا
فطيم : ألو مناية لا اتصيحين ما يستاهل دمعه منج
مناية : حاسة بقلبي يتقطع انتي مب حاسة فيني
فطيم : مناية فكري بعقلج وبتشوفين ان كلامي و كلام اهلج هو الصح
مناية : خلاص اخليج الحين تعبانة برقد
فطيم : اوكيه عيل ريحي انتي ومثل ما قلتلج فكري بعقلج .. مع السلامة
مناية : مع السلامة .
قاعد على الشاطي ويذكر حبيبته " ما اقدر اعيش من دونج مناية ما اقدر بحاول قد ما اقدر اني اقنع ابوي وانا عند وعدي .. آآه أحبج أحبج مووووت ... انتي نظر عيني ونبض قلبي إللي احيا به مستحيل اتخلى عنج مستحيل .. "
شل تلفونه واتصل في مناية .. تم يرن ويرن ومحد يرد : غريبة أول مرة اتسويها وما اترد علي ..!!
دة .. خليني اشوف شغلي وفي الظلام حاضنة مخدتها واتشوف تلفونها واتصيح " سالم لا تتصل قلبي يتقطع يوم اشوف التلفون يرن برقمك مب قادرة اكلمك شو تباني اقولك . اقول اني خلاص بروح عنك بغيب عنك غناتك ضاعت عنك غلاتك ماعدت تملكها كل شئ انتهى كل شي راح في غمضة عين بدون ما نحسب له حساب آآآه ياربي شسوي "
قامت وتمسحت بتصلي ركعتين عشان ترتاح من الهم إللي حاسة فيه .
أم سالم : بو سالم ترا ولدك من ظهر مارد البيت وإلحين الساعة 1 ونص انا خايفة لا يصير له شي .
بو سالم : ولدج مب ياهل بيرجع وين بيروح يعني . خليني ارقد وراي نشة الصبح .
أم سالم : مادري كيف قلبك يتحمل انك تقسى عليه جذيه
بو سالم : قلتلج ولدج ريال وما بيصيبه شي
أم سالم : الله يسمع منك ..
رجع سالم البيت على الساعة 2 وبدون محد يحس دخل غرفته وهو حاس بضيجه ..
بتصل فيه وانا ظاهرة الصبح وبقوله اللي صار وخلاص بسني تفكير اذا بفكر بعقلي فكلامهم كلهم صح .. ورقدت من التعب
أم محمد : مناية .. مناية قومي بسج ارقاد وراج داوم
مناية : هااا امي ان شاء الله إلحين بقوم
أم محمد : قومي مب اتردين ترقدين
مناية : بقوم بقوم
أم محمد : يلا بزهب لج الريوق
مناية : لا امي مابي ريوق ما اشتهي شي
أم محمد : على الأقل اشربي لج حليب
مناية : لا امي ما اشتهي شي
أم محمد : على راحتج
نشت وتغسلت واتزهبت وقعدت جدام المرايا اتجهز الكلام اللي بتقوله حق سالم " يارب ساعدني على هالخطوة "
طلعت من البيت واتصلت فيه ...
سالم : هلا منايتي وينج البارحة اتصل فيج ما اتردين
مناية " ياربي لا اترمسني جذيه ماقدراتحمل اكثر " ونزلت دمعة من عينها .. من شوقها ومن حبها له بس بدّت هالمرة أهلها عليه
سالم : مناية ألوو .. وينج ليش ما اتردين
مناية : سالم
سالم : عيون سالم آمري
مناية " آآه ياقلبي كفاية لا اتعذبني بحبك وبكلامك
سالم : مناية اشفيج ما ترمسين
مناية : حبيت اقولك ان اللي بينا انتهى ................. وسكتت وفي داخلها ألم ورفض لكل اللي يصير بس مب بيدها شي ثاني ..
سالم : انتي شو اتقولين ؟؟
مناية : سالم انت تأخرت ترييتك وايد بس انت ما سويت شي لين إلحين واهلي هالمرة وافقوا على .....
قاطعها وبصوت عالي : انتي صااااااحية شو اتقولين شو هاللي اسمعه منايه انا احبج وانتي تدرين وقلت لج اني .....
مناية : سالم كم مرة وعدتني بس ما نفذت وعدك
سالم : انتي ما اتعرفين باللي يصير انا ما اصبر بدونج حراام عليج لا اتسوين فيني جذيه .
مناية : آآآآه يا سالم لو تدري باللي بقلبي احبك بس منو بيفهمني منو بيسمعني خلاص كل اللي بنيناه راح واسامي عيالنا اللي اخترناهم ماراح يشوفون النور والبيت اللي حلمنا فيه ماراح نسكن فيه ..
سالم : حرام عليج لا اتقولين جذيه لا اتحطميني
مناية : انا اللي تحطمت
سالم : ..............." حرقت دمعته خده "
مناية : انا آسفة على كل شي
سالم : .........................
(( من يحس بلوعتي ووجدي ودموعي
ويدري حجم النار لي تسكن ضلوعي
رغم هذا لك انا معلن خضوعي
صامت في وجه رمشك والعيون ))
مناية : سالم ليش ما اترد علي
سالم : ............................... صكر التلفون
(( لقيت روحي بعد ما انا لقيتك
بعد اللقا أرجوك لا تغيبي ..
صعب علي أبقى وأنا مانسيتك
احساسي كني بين ربعي غريبي ))

تمت اتصيح " لو تدري ان كل اللي قلته من ورا قلبي احبك احبك احبك بس ما اقدر اعارض اهلي ما اقدر ... "

ظهر من غرفته وشاف امه وابوه بالصالة : رااااااحت خلاااااااااص رااااحت ارتحتوااا إلحين آآآآه منو بيحس فيني انتوا السبب انتو اللي جتلتوا حبي لهاااا انتوا السبب ...... بنتقم منكم بنتقم .. وظهر من البيت وركب سيارته واتصل في مناية ..
لحقته امه: سالم بسم الله اشفيك يا وليدي تعال رد علي
بو سالم : ما عليج منه حركات شباب
أم سالم : ولدي بيضيع مني وانت بعدك مب حاس فيه .... وقعدت اتصيح
مناية : أا .. أألوو
سالم : تبيني ولا لأ
مناية : سالمسالم : سألتج سؤال تبيني ولا لأ
مناية : اسمعني سالم .. انت وين ؟؟
سالم : انا ... ... يهمج اتعرفين !
مناية ودموعها على خدها : اكيد يهمني
سالم : عيل تمي معاي لين آخر لحظة بحياتي
مناية : ساااااااالم شو تقصد ؟
سالم : انتي اتعرفين شو اقصد
مناية : انت ويييييييييين ؟؟
سالم : انا إلحين مسرع وابيج اتمين معاي لين ما تسمعين صوت الحادث وتسمعين اخر نفس مني بيكون لج انتي
مناية : حرااااااام عليك لا اتسوي بعمرك جذيه
سالم : حرام عليج انتي اللي تركتيني
مناية : انا ما تركتك بس ..............................
.................................................. ........... ألووو .. انقطع الخط

اللؤلؤة السوداء

مناية : سااااااااااااالم لاااااااااااا ألووووووو ألووووووو رد علي ساااااالم
وردت اتصلت لكن يعطيها التلفون مغلق ....
لا لا مستحيل سااااااالم اتصلت بفطيم : ألو لحقي علي فطيم
فطيم : مناية انتي وين تأخرتي ؟؟
مناية : سالم يا فطيم سالم
فطيم : اشفييييه ؟؟
مناية : اظن انه سوا حادث لحقي علي ابي اشوفه ابي اسير له راح عني سالم راااااااح فطيم بموووت بمووووت
فطيم : بسم الله عليج انتي هدي وانا بتصرف
مناية : شو بتسوين ؟؟
فطيم : عطيني نص ساعة بتصل بالمستشفيات اذا امسوي حادث اكيد بيكون عندهم خبر ..
مناية : دخيلج فطيم ابي اشوفه اتصرفي .... وصكرت عنها وتمت اتصيح
" آآآآآآآه يا ساااالم ليش سويت بعمرك جذيه انا احبك احبك "
وعقب ربع ساعة اتصلت فطيم فيهااا : مناية
مناية : طمنيني فطيم دخيلج
فطيم : .............
مناية : ردي علي اشفيج
فطيم : مناية سالم حالته خطيرة وهو إلحين بالمستشفى
مناية : شووووو أنا السبب أنا .. ابي اشوفه
فطيم : شو اتشوفينه تخبلتي
مناية : الله يخليج فطيم تعالي وياي ابي اشوفه مب قادرة اكون بعيدة عنه وهو بهالحالة ...
فطيم : بس
مناية : لا بس ولا شي بتين ولا لأ
فطيم : خلاص إلحين بظهر لج وبنسير
أم سالم : شو منو انت ؟
الموظف : انا موظف الاستقبال بالمستشفى وبلغوني عشان اتصل فيكم واخبركم عن ولدكم ...
أم سالم : بو سالم الحق علي ولدي راح ولدي حشاشة يوفي غاب عني
بو سالم : بسم الله اشفيج
أم سالم : سالم سالم راح سالم راح امسوي حادث وحالته خطيرة آآه يا ولدي ...
نش بو سالم من مكانه ...
أم سالم : خذني وياك بشوف ولدي
مناية : فطيم انتي وقفي اهني وانا بدخل عليه
فطيم : بس ممنوع تدخلين
مناية : انا ما عليه منهم محد يقدر يمنعني من شوفته
فطيم : انزين دخلي وانا براقب المكان
دخلت مناية غرفة العناية عند سالم واول ما شافته تمت اتصيح وهي اتشوف الوايرات المركبة على جسمه والأجهزة في كل مكان واشوي اشوي مشت صوبه وتمت تطالعه وتدعي ان الله يقومه بالسلامة .. وقعدت على الكرسي اللي عدال السرير وحطت ايدها على ايده ودموعها حارة على خدها : سالم أنا احبك لا تتركني ما اقدر اعيش من دونك انت الهوا اللي اتنفسه انت حياتي كلها دخيلك لا تتركني ما اتخيل الحياة بدونك بدون صوتك بدون حبك لا مستحيل .... وتمت اتصيح ودموعها اتطيح على ايده ..
تحركت ايده وحست فيه : سالم حبيبي انا اهني وياك ما بخليك قوم الله يخليك قوم خلنا انروح بسك ارقاد ... حبيبي احبك ومرة ثانية ما بغثك بكلامي صدقني وبترياك طول العمر ... بترياك وخنقتها العبرة وتمت اتصيح .
حاول سالم انه يفتح عينه بصعوبة : غنااا ... غناااتي
رفعت راسها وشافته صحى : سالم حبيبي انا وياك احبك احبك انت بس قوم نظهر من اهني وصدقني ببقى معاك طول العمر
سالم : مناااية خلاص الوقت تأخر ... حاس اني ..
مناية : شو الوقت تأخر حبيبي انا ببيع الكل عشانك وصدقني لو بتتأخر عني بالسنين بترياك بترياااااك ..... تسمعني وتمت اتصيح
سالم : الغلا ما اوصيج على عمرج
واطالعته بألم : سالم لا اتقول جذيه انت ابخير انت بتقوم صح قول لي انك ابخير وما فيك شي .. يلا بسك تغلي لا تدلع أحبك وانت اغلى ناسي وأوعدك ما اتركك مرة ثانية .. قووووم دخيلك قوووووم
سالم : مناية حبيت اقولج انج اغلى ناسي وانا احبج وبتم احبج اذكريني دوم ... واذا عرستي ما اوصيج سمي ولدج باسمي و ............. وسكت
مناية : لااااااا سااااااالم حرااام عليك لا اتقول جذيه انت ابخير وإلحين بخبر الدكتور انه يظهرك وبنسير البحر انت اتحب البحر صح بنقعد اهناك وبتسمعني قصايدك اللي احبهااا يلا قوم يلا سالم ...
انشلت الحركة في الحياة والهدوء والصمت وريحة الموت في كل زاوية من الغرفة ... وماشي غير صوت الجهاز يعلن توقف نبضات القلب .. قلب سالم اللي كله حب ووفا لحبيبته . دخلت عليها فطيم : مناية يلا طولتي
مناية : صبري فطيم سالم بيطلع وياي بنسير البحر
مشت فطيم لين عند ربيعتها وشافت الأجهزة .... : منااااية
مناية : يلا سالم يلا حبيبي قوم بسك كسل ولا بزعل منك
فطيم : إن لله وإنا إليه راجعون ... مناية استغفري ربج سالم عطاج عمره
مناية : لاااااااااااااا انتي اصلا من زمان ما اتدانينه عشان جذيه اتقولين لي هالكلام ..
فطيم ودموعها ع خدها : مناية الموت حق
مناية : طلعي برع برررررررع

دخل الدكتور على صريخهم : منو سمحلكم تدخلون اهني
وشاف الجهاز وغطى جسم سالم ...
الدكتور : عظم الله اجركم
مناية : انت شو اتقول .. سالم ابخير مافيه شي بس هو راقد إلحين لانه تعبان اشوي ..
يودتها فطيم وظهرتها من الغرفة وشافوا في ويهم أم سالم وبو سالم
بس مشوا وظهروا من الممر اللي هم فيه ..

ظهر الدكتور : انت بو سالم
بو سالم : هيه نعم خير دكتور اشفيه ولدي
الدكتور : عظم الله اجركم
انهارت أم سالم وطاحت عليهم ....................

مرت الأيام ومناية عايشة على ذكرى سالم وانطوت على نفسها ورفضت كل من ياهاا ...

قاعده تناظر صورته " سالم شوف هالخاطرة انت كتبتها عني تذكر كنت دوم اترددها لي ..
أحبج كلمة طالما رددها لساني ونطق بها قلبي وحركت اركاني
وخفق بهالفواد وداعبت وجداني يامن شغلتي عقلي وتفكيري
يا من بقربج صارت حياتي وبابتعادج عني مماتي ..
اذا سمعت صوتج غمرتني الحياة واتنفس فوادي
تضحك لي الدنيا بابتسامة منج ياحبيبتي ..
بحزن حتى تفرحي وببجي حتى تضحكي .. بحمل همومج وآهاتج على كاهلي
حتى ترتاحي ..
واعلمي لو في موتي حياتج اموت حتى تعيشي ..
وبس أقولها لج أحبج أحبج ما قلتها لأحد قبلج .."بس انا مابيك اتموت ............. سالم رد لي أنا احبك ليتك معاي عشان اقولك اشكثر أنا افتقدك اشكثر انا اعشقك اشكثر انا محتاجتنك في هاللحظة ابيك اتكون يمي دوم ..... سالم ذكراك في قلبي مهما تمر سنين بتظل عايش فقلبي ومحد بياخذ مكانك .. اشتقت لوجودك معاي ولصوتك ولحبك ليتك معاي ليتك ....
"تصدق قد ما حنيت اشوفك في زوايا البيت
واسولف معك عن حزني واحس ان انت تدري به
شسوي بالألم والآه ولكن البقا لله
يصبرني على بعادك وذا حظي وراضيبه " فيصل اليامي
ابرك لي .لامة ..
تقبلوا مني خالص تحياتي أختكم اللؤلؤة السوداء.......إنشالله تعجبكم

star.13.3

جزاكي الله خيرا أختي الكريمة (( اللؤلؤة السوداء )) على هذه القصة المؤثرة جدا جدا ..

ونقلك مميز ..

بس عورتي قلوبنا ..

أكيد هذه القصة من واقع الحياة وحتى لو كانت من تأليف كاتب فإنني أرى انه من الممكن بل من الأكيد

أن تكون مثل هذه القصص متحققة على أرض الواقع ..

والله مشكلة هالعادة (( الولد يتجوز بنت عمه )) ..

الله يهديهم ..

وتقبلي سلامي وتحياتي وتقديري واحترامي ....

__________________

اللؤلؤة السوداء

تسلم أخوي على مرورك الطيب..........
هذي العادات بس بدت إلحين تتغير مع تغير العصر.....